A poesía
é
a única verdade
absolutamente
libre
de todo lastre
de todo prexuízo
de todo punto de vista



O poético non reside só na palabra: é unha maneira de actuar, unha maneira de estar no mundo e convivir cos seres e as cousas. Aquel que ignora a poesía é un mutilado, así como o é quen ignora o amor. Esta afirmación podería suxerirnos a idea de que vivimos nun mundo de mutilados, pero non é así: o que atopamos a cotío non é a falta do impulso poético senón a súa represión. Aldo Pellegrini



PORQUE NON SOMOS MUTILADOS

PORQUE ESTAMOS NA ZONA DE SOMBRA DA REPRESIÓN


A poesía
é
a única verdade
absolutamente
libre
de todo lastre
de todo prexuízo
de todo punto de vista

é
a liberdade total
unha escravitude paradóxica e gorentosa
un estado de ánimo exaltado
unha luxuria da linguaxe
unha furia
na boca de todos
os que amasamos esta gran
bola de pan

non hai materia máis plástica
nin máis espiritual
ca a linguaxe articulada
pola voz humana

léase María Callas
Gilbert Becaud
a miña visiña cando canta
a miña nai chamando no serán polos carreiros
os nenos xogando aos indios entre os piñeiros
o cura! que nada curaba cando a finais dos sesenta se poñía solemne e cabrón para  nos invadir coa súa homilía de horror

a palabra libre
da poesía
é o ámbito
para
a liberación total

nesta era global
de totalitarismo
ideolóxico
tecnolóxico
e
xigantismo
da miseria
e
fascismo ...total

construímos
entre moitas e moitos
muriños
de pedra sobre pedra
encaixes milenarios
(para facer acopio, se se dá o caso, de munición)
neles medrarán
couselos
musgo
carrizo
brión
fentos ecuatoriais
desexos arborescentes
onde poderemos
por fin
dar
acubillo
ao
futuro
que teñamos
a ousadía
de
imaxinar.

Orola


in amarellesbravos.blogspot.com
Orola <orola45(0)hotmail.com>